Главная » 2011 » Aprel » 13 » “Yorqin cho‘qqi” (ingl. Light Peak) Bu kabel 1 soniyada 10 gigabaytgacha malumotlarni yetkaza oladi
16:42
“Yorqin cho‘qqi” (ingl. Light Peak) Bu kabel 1 soniyada 10 gigabaytgacha malumotlarni yetkaza oladi
Internet tarmog‘i optik tolali kabellardan tashkil topganini yaxshi bilamiz. Yana shu narsa aniqlanganki, fotonlar baytli ma'lumotlarni elektronlardan tezroq uzatadi. Tarmoqning ko‘ngildagidek faoliyat ko‘rsatishida avvalo kabel tolasi va fotonlar katta rol o‘ynaydi. Uzatilayotgan axborot ishonchliligi qaysidir ma'noda kabelning nimalardan tashkil topganiga bevosita bog‘liq. Vaholanki, qisqa masofalarga ma'lumotni mis kabellarda yetkazish hamon dolzarbligini yo‘qotgan emas: ham arzon, ham xizmat ko‘rsatish oson. Xo‘sh, muqobil takliflar bormi? Bu savolga Intel kompaniyasi ijobiy yechimi bilan javob qaytardi.
San-Fransiskoda Intel mutaxassislari uchun o‘tkazilgan xalqaro forumda kompaniya yangi turdagi optik kabel chiqarishini ma'lum qildi. Mis kabellar o‘rnini egallashi kutilayotgan bu optik kabellar yanada arzon bo‘lib, noutbuk, qattiq disk, telefon yoki uydagi kompyuterni ulashda qo‘llaniladi.
"Yorqin cho‘qqi” (ingl. Light Peak) deb nomlanayotgan bu kabel 1 soniyada 10 gigabaytgacha ma'lumotni bir qurilmadan boshqasiga yetkaza oladi. Buni Blu-ray videopleerdagi film namoyishiga tenglashtirish mumkin. Light Peak kabelining yakka tolasi turli toifadagi ma'lumotlarni birvarakayiga uzata oladi, demak, diskning rezerv nusxasini ham yaratish, qolaversa, shu paytning o‘zida o‘ta yuqori tiniqlikdagi videoni uzatish imkoniyatlari mavjud. Light Peak kabelining har ikki uchida ma'lumotlarni kodlovchi qurilmalar (elektron chiplar) o‘rnatiladi, ular ma'lumotlarni manziliga jo‘natish uchun o‘ziga xos saralash o‘tkazadi. Shuningdek, bu chiplar yoki mikrosxemalar kiruvchi signallarni kuchaytirishga xizmat qiladi.
"Bir qarashda bu kabellar yuqori texnologiyalarga ega emasdek ko‘rinishi mumkin, — deydi Janubiy Kaliforniya universitetining professori Alan Villner. — Biroq kremniy fotonikasi bozori juda ulkan va istiqbolli. Bu kabellar juda yuqori o‘tkazuvchanligi bilan meni lol qoldirdi. Vaqti kelib, foydalanuvchilar bu kabellar arzon va qulayligiga o‘zlari ham ishonch hosil qilishadi. Hech mubolag‘asiz, buni haqiqiy kashfiyot deyish mumkin”.
"Bizning optik texnologiyamiz asosiy platforma uchun mo‘ljallangan, — deya ta'kidlaydi Intelning Photonics laboratoriyasi direktori Mario Panitsiya. — Hozir ma'lumot uzatish tezligini 10 Gbit/soniya, keyinchalik 100 gigabaytgacha yetkazish ustida izlanishdamiz”.
Light Peak kabelini 100 metrgacha yetkazish mumkin ekan, har holda Intel muhandislarining bunga ishonchi komil.